Aeri l'erba virdi inchìa li me pinsera

Di Petralonga a la Busammra nun vidìa atru

Pinsavi: "Finarmenti arrivò la primavera,

Ci iccò du vuci e assicutò, lu 'nvernu latru"

A viviri pi comu è ddi ggiustu, com'è scrittu

Dissi: " è ghhiri dda, chissu è ffari!"

Lu dissi e ntall'airu arristò dittu.

Oggi m'arruvigghiai ca mi chiancìa lu cori

M'affacciu e è tuttu giallu lu me munnu

Lu filu d'erba, si ggià unn'è mmortu, mori

La primavera siciliana annurò un secunnu.

Nun c'è cchiù armu di nesciri, di iri a fari ggira

Lu tempu disgrazziatu si futtì li me spiranzi,

Luntanu nta la vità passata è ormà dda sira

Ca cu sgurdu chinu d'oru taliava 'nnanzi.

La vita è na primavera siciliana, oh figghia!

Ca cumincia cu lu màrtidi e finisci cu la missa.

Nun aspittari a nuddu, vivi di la buttigghia

Ca la simana chi vveni un'è cchiù cchissa.

Cu aspetta mori sanu ma nun ci servi a nnenti

Picchi aspittannu la so vita, n'tridici arristò.

Cu avi prescia quannu mori, mori allegramenti

Campò quannu era virdi e cu lu ggiallu s'astutò.

([...] Dum loquimur, fugerit invida

aetas: carpe diem, quam minimum credula postero)

 Torna all'indice della rubrica L'angolo aperto della poesia