Lu surdu addumannò si lu bottu avia sintutu. “Lu vitti! – arrispunnì un vecchiu orvu e mutu -
vinni di la chiazza unni c’è tutta dda ggenti.
Spararu!” “A ccu spararu?” “A ddu o tri delinquenti!”

“Chi ddìcinu?” “ ’Nca attenta, stannu griannu,
fannu voci grossa ca futuru e paci un nn’annu,
grianu ca nun c’è dignità nè c’è spiranza
si nni scurdamu di tutta dda mattanza.

Di omini nta ll’aria d’un matinu sparpagghiati
di picciriddi nichi ‘nta ll’acitu squagghiati
di sbirri ca la testa nun sappiru calari
di un chiantu di mugghieri ca nun si po’ attintari”

“E sti nnomi chi ammuntuanu a ccu appartennu?”
“Su figghi di na matri ca salutaru niscennu,
sapennu di muriri, circannu d’un taliari,
ca di cu si voli beni lu chiantu nun si po’ suppurtari ”

“Me figghiu un ci ì. E si cci va a llignati u pìgghiu”.
“Zittuti, vecchiu babbu, c’è me figghia cu to figghiu,
e li figghi di li patri di tuttu quantu Cunigghiuni
ci su milli picciotta ma assumigghianu a un miliuni.

Milli figghi ca grianu ca cu è mmafiusu è ddisgrazziatu,
ca nni mettinu a lu postu e nostru postu è lu passatu.
La Sicilia è d’iddi, di li ggiovanni ca sannu
ca Farconi nun murì ed è dda ca sta griannu!”